Извори на протеини од зеленчукот за време на постот

Периодот на пост носи промени во дневната исхрана, но може да биде и прилика да се пробаат нови нешта. Храната на база на растенија често крие многу повеќе хранливи состојки одошто сте мислеле, важно е во исхраната да имате застапено се во текот на постот - како протеин.

Ви претставуваме листа на 6 протеини од зеленчуци кои ќе ви обезбедат избалансирана исхрана за време на постот.

Киноа

Киноата е дел од семејството на древни житарици, која низ илјадници години претрпела многу малку генетски промени. Покрај големото количество на протеини, содржи и други хранливи состојки како железо и магнезиум, но и поголемо количество на влакна од многу други зрна.
Оризот можете да го замените со киноа во сите посни рецепти, а оваа прекрасна житарица е совршена и за салати, супи и гулаш.

Тофу

Тофуто е вегетаријанска храна која се добива од млеко од соја. Сојата е многу популарна кај вегетаријанците поради високата содржина на протеини, железо, калциум и фосфор.
Уживајте во различните примени на тофу сирењето, бидејќи тоа ќе го преземе вкусот од другата храна со која се готви. Во тавче, помешајте го со малку соја сос, вашите омилени зачини, масло од сусам и малку мед, а може да додадете и лук и друг зеленчук.
Можете да го додадете и во својот утрински шејк за дополнителен протеин во текот на постот!

Грав

Освен што има голема содржина на протеини, гравот содржи и други хранливи супстанци потребни на вашиот организам како што се железо, цинк, магнезиум и влакна. Се препорачува за подобро варење а неговата текстура го прави соодветен за замена на животинскиот протеин во многу јадења. На пример, може да се одлучите за бургер од грав за време на постот.

За бургер од грав помешајте конзерва црвен грав, презла и лук кој веќе сте го пропржиле, неколку лажици брашно и додајте ги омилените зачини. Потоа запржете ги во тавче на среден оган.

Леблебија

Леблебијата е богата со влакна и протеини и е неизбежен дел од медитеранската исхрана. Може да се јаде во салата или гулаш, но едно од најпопуларните јадења од леблебија е хумус.
Измешајте две конзерви леблебија со маслиново масло, крем од сусам ( тахини ), две чешниња лук, сол, бибер, кумин и сок од лимон. Може да експериментирате во поглед на количината како би го добиле совршениот хумус за вас. Може да додадете и други вкусови, како пиперка.

Бадеми

Бадемите се одличен извор на протеини- само 100 гр бадеми содржат 21.15 гр протеин. Богати се и со витамин Е , што значи дека се важен извор на антиоксиданси. Може да ви помогнат за одржување на телесната тежина. Консумирањето бадеми може да има и бенефити за кардиоваскуларниот систем и може да ја спречи појавата на дијабетис.

Се препорачува бадемот да се јаде сосе лушпата, како би се искористиле сите негови хранливи состојки. Пробајте да замените една или две ужини дневно со рака бадеми. За време на постот може да ги исечкате и додадете во салата, јогурт или млеко од соја со житарици.

Путер од кикирики

Путерот од кикирики е богат со хранливи состојки, кој кога се консумира умерено, може да има бенефит врз вашиот организам на долги стази. Освен што е вкусен, содржи протеини, магнезиум, калиум, витамини Е и Б6. Иако е совршен наутро на парче леб, можете да го додаете и во дресинг за салата. Само помешајте две лажици од овие состојки: путер од кикирики, соја сос, мед, оцет. Потоа додадете лук, ѓумбир и малку вода како би ја постигнале саканата густина.

Со волку вкусен избор, нема ни да знаете дека постите!